कराड/प्रतिनिधी 

कराड तालुक्यातील गुन्हेगारीला आळा घालण्यासाठी कडक आणि धडाकेबाज भूमिका घेत अल्पावधीतच कराडकरांच्या मनात विश्वासाचे स्थान निर्माण करणारे पोलीस अधिकारी सूरज गुरव यांची सातारा जिल्ह्याच्या अप्पर पोलीस अधीक्षकपदी नियुक्ती झाली आहे. त्यांच्या या नियुक्तीमुळे सातारा जिल्ह्याच्या पोलीस दलात पुन्हा एकदा त्यांच्या अनुभवाचा आणि कार्यशैलीचा उपयोग होणार आहे. यापूर्वी सातारा जिल्ह्याच्या अप्पर पोलीस अधीक्षकपदाची जबाबदारी सांभाळणाऱ्या डॉ. वैशाली कडुकर यांची पुणे येथे बदली झाली आहे.

कराड येथे पोलीस उपअधीक्षक म्हणून २२ सप्टेंबर २०१९ रोजी पदभार स्वीकारल्यानंतर सूरज गुरव यांनी गुन्हेगारी प्रवृत्तीच्या व्यक्तींविरोधात कठोर भूमिका घेतली होती. अवैध धंदे, गुन्हेगारी कारवाया आणि कायदा-सुव्यवस्थेला आव्हान देणाऱ्या प्रवृत्तींवर त्यांनी कारवाईचा धडाका लावला होता. त्यांच्या या कामामुळे सामान्य नागरिकांमध्ये पोलिसांविषयी विश्वास निर्माण झाला होता.

मात्र, कराडमधील त्यांचा कार्यकाळ वर्षभराच्या आतच संपुष्टात आला आणि त्यांची नागपूर येथे बदली झाली. या बदलीच्या निर्णयाने कराडमधील नागरिकांमध्ये नाराजी व्यक्त झाली होती. गुरव यांची बदली रद्द करून त्यांना कराडमध्येच कायम ठेवावे, या मागणीसाठी कराडकर नागरिकांनी समर्थनार्थ मोर्चाही काढला होता. एखाद्या पोलीस अधिकाऱ्याच्या बदलीविरोधात नागरिकांनी रस्त्यावर उतरून समर्थन व्यक्त करण्याची ही घटना त्यावेळी चर्चेचा विषय ठरली होती.

कोल्हापुरातील बाणेदार भूमिकेमुळे राज्यभर चर्चा

गुरव यांची ओळख केवळ कडक पोलीस अधिकारी म्हणूनच नाही, तर राजकीय दबावापुढे न झुकणारे अधिकारी म्हणूनही आहे. २०१९ मध्ये कोल्हापूर महापालिकेच्या महापौर निवडणुकीदरम्यान आमदार हसन मुश्रीफ आणि आमदार सतेज पाटील यांच्याशी झालेल्या प्रसंगात त्यांनी नियमांची ठाम बाजू मांडली होती. या घटनेनंतर त्यांची राज्यभर चर्चा झाली. त्यांच्या या कर्तव्यनिष्ठ भूमिकेची दखल घेत त्यांना गृहमंत्री पदकाने सन्मानित करण्यात आले होते.

त्यानंतर त्यांनी पुणे लाचलुचपत प्रतिबंधक विभागातही काम केले. नांदेड येथे अतिरिक्त पोलीस अधीक्षक म्हणून कार्यरत असताना त्यांनी पोलीस प्रशासनाच्या कामासोबतच सामाजिक आणि ऐतिहासिक उपक्रमांनाही प्रोत्साहन दिले. फेब्रुवारी २०२५ मध्ये त्यांच्या पुढाकाराने नांदेडमधील ३७ गडकिल्लेदारांसाठी चार दिवसांचा ऐतिहासिक गडकिल्ले अभ्यास दौरा आयोजित करण्यात आला होता. या दौऱ्यात भुईकोट, दौलतगड, मल्हारगड, राजगड आणि सिंहगड यांसारख्या ऐतिहासिक किल्ल्यांना भेट देण्यात आली. छत्रपती शिवाजी महाराजांचा इतिहास आणि गडकिल्ल्यांचे महत्त्व नव्या पिढीपर्यंत पोहोचविण्याचा या उपक्रमामागील उद्देश होता.

कराडमधील त्यांच्या पूर्वीच्या कार्यकाळाची आठवण आजही नागरिकांकडून काढली जाते. विशेषतः गुन्हेगारीविरोधातील त्यांची आक्रमक कार्यपद्धती आणि सामान्य नागरिकांशी असलेला संवाद यामुळे त्यांना कराडमध्ये स्वतंत्र ओळख मिळाली होती. आता पुन्हा सातारा जिल्ह्यात जबाबदारी मिळाल्याने त्यांच्या कार्यशैलीचा जिल्ह्याला कसा लाभ होतो, याकडे नागरिकांचे लक्ष लागले आहे.