मोबाईल हरविल्यास किंवा चोरी झाल्यास ग्रामस्थांनी न घाबरता पोलिसांवर विश्वास ठेवून तात्काळ कराड तालुका पोलीस स्टेशनशी संपर्क साधावा. तसेच ceir.gov.in या पोर्टलवर आपली तक्रार नोंदवावी असे आवाहन कराड तालुका पोलीस ठाण्याचे पोलीस निरीक्षक महेंद्र जगताप यांनी केले आहे.
कराड, दि. 11 ः कराड ग्रामीण पोलीस स्टेशनच्या हद्दीतून चोरीला गेलेले तसेच गहाळ झालेले सुमारे साडे बारा लाख रूपये किमतीचे 42 मोबाईल शोधण्यात कराड तालुका गुन्हे प्रकटीकरण शाखेला यश आले आहे. कोल्हापूर, औरंगाबाद, नाशिक, अहमदनगर, सोलापूर, पुणे जिल्ह्यासह कर्नाटक, उत्तरप्रदेश तसेच गुजरात राज्यातून हे मोबाईल शोधून काढण्यात आले आहेत. सोमवारी पोलीस निरीक्षक महेंद्र जगताप यांच्या हस्ते हे सर्व मोबाईल त्यांच्या मूळ मालकांना परत करण्यात आले. आपला हरवलेला मोबाईल पुन्हा मिळाल्यामुळे ग्रामस्थांनी पोलिसांचे आभार मानले आहेत.
गेल्या सहा महिन्यांच्या कालावधीत कराड ग्रामीण भागातून मोठ्या प्रमाणावर मोबाईल गहाळ होण्याच्या किंवा चोरीला जाण्याच्या घटना घडल्या होत्या. या वाढत्या तक्रारींची दखल घेत पोलीस अधीक्षक निखील पिंगळे, अपर पोलीस अधीक्षक डॉ. वैशाली कडुकर यांनी सातारा जिल्यातील सर्व पोलीस स्टेशन प्रभारी अधिकारी यांना सी.ई.आर.आय. पोर्टलद्वारे पोलीस स्टेशन हद्दीतील गहाळ झालेले मोबाईल शोधण्याच्या सूचना दिल्या होत्या. त्यांचे मार्गदर्शनाखाली पोलीस उपअधीक्षक राजश्री पाटील व कराड ग्रामीण पोलीस ठाण्याचे पोलीस निरीक्षक महेंद्र जगताप यांनी हे मोबाईल शोधून काढण्यासाठी ठोस पावले उचलली. त्यांनी गुन्हे प्रकटीकरण शाखेला चोरीस गेलेल्या मोबाईलचा तांत्रिक तपास करून ते शोधण्याचे आदेश दिले होते.
या आदेशानुसार पोलिसांनी अत्यंत कौशल्याने तांत्रिक विश्लेषणाद्वारे माहिती घेऊन तपास करत चोरीस गेलेल्या मोबाईलचा माग काढला. तपासाची व्याप्ती वाढवत पोलिसांनी कोल्हापूर, औरंगाबाद, नाशिक, अहमदनगर, सोलापूर, पुणे जिल्ह्यासह कर्नाटक, उत्तरप्रदेश तसेच गुजरात राज्यातील काही जिल्ह्यांपर्यंत पोहोचून सुमारे साडे बारा लाख रूपये किमतीचे 42 मोबाईल हस्तगत केले.
सोमवारी पोलीस निरीक्षक महेंद्र जगताप यांच्या हस्ते हे सर्व मोबाईल मूळ मालकांना सुपूर्द करण्यात आले. मोबाईल मिळाल्यानंतर अनेक मालकांनी समाधान व्यक्त केले.
ही यशस्वी कारवाई पोलीस अधीक्षक निखील पिंगळे, अपर पोलीस अधीक्षक डॉ. वैशाली कडुकर, पोलीस उपअधीक्षक राजश्री पाटील, पोलीस निरीक्षक महेंद्र जगताप यांच्या मार्गदर्शनाखाली गुन्हे प्रकटीकरण शाखेचे सहाय्यक पोलीस निरीक्षक सखाराम बिराजदार, पोलीस उपनिरीक्षक धनंजय पाटील, गुन्हे प्रकटीकरण शाखेचे सहाय्यक पोलीस उपनिरीक्षक नितीन येळवे, पोलीस हवालदार सचिन निकम, किरण बामणे, विनोद माने, प्रफुल्ल गाडे, रविंद्र देशमुख, मयूर देशमुख यांनी केली.
