म्हासुर्णे/निमसोड : शेतीच्या व शेतातील विहिरीच्या पाण्याच्या किरकोळ वादाच्या कारणातून व वडिलांना शिवीगाळ व मारहाणीच्या कारणातून गुरुवारी सायंकाळी आरोपी संजय पांडुरंग माने व वडील पांडुरंग देवबा माने यांनी मयत भाऊसो पांडुरंग माने यांना काठीने मारहाण केली. त्या मारहाणीत जखमी झालेल्या भाऊसो पांडुरंग माने यांचा उपचारादरम्यान जिल्हा रुग्णालयात मृत्यू झाला. याप्रकरणी भाऊ संजय पांडुरंग माने व वडील पांडुरंग देवबा माने (रा. म्हासुर्णे, ता. खटाव) यांच्यावर संशय असून, त्यांच्यावर गुन्हा नोंद झाला आहे.

याबाबत मिळालेली माहिती अशी की, मयत भाऊसो व संशयित संजय पांडुरंग माने हे सख्खे भाऊ आहेत व पाडुरंग देवबा माने हे मयत भाऊसो मानेंचे वडील आहेत. त्यांच्यात गुरुवारी रात्री किरकोळ कारणावरून वाद झाला होता. दरम्यान, मयत भाऊसो यांनी वडील पांडुरंग देवबा माने यांना शिवीगाळ केली होती. त्याचा राग मनात धरून आरोपी संजय पांडुरंग माने व वडील पाडुरंग देवबा माने यांनी गुरुवारी सायंकाळी साडेआठ वाजण्याच्या सुमारास भाऊसो यांना काठीने मारहाण केली. या मारहाणीत भाऊसो हे गंभीर जखमी झाल्याने त्यांना उपचारासाठी जिल्हा रुग्णालयात दाखल केले होते. परंतु, उपचारादरम्यान त्यांचा मृत्यू झाला आहे.

घटनेची माहिती मिळताच उपविभागीय पोलिस अधिकारी डॉ.नीलेश देशमुख, सहायक पोलीस निरीक्षक मालोजीराव देशमुख, पोलीस उपनिरीक्षक शहाजी गोसावी यांच्यासह पोलिसांचा फौजफाटा म्हासुर्णे येथे चौकशीसाठी दाखल झाला. चौकशी दरम्यान संजय पांडुरंग माने व पांडुरंग देवबा माने यांच्याकडून मारहाण झाल्याचे निष्पन्न झाले असून आरोपी संजय पांडुरंग माने यांच्यावर गुन्हा दाखल झाला असून, अधिक तपास उपविभागीय पोलीस अधिकारी डॉ. नीलेश देशमुख, सहायक पोलीस निरीक्षक मालोजीराव देशमुख, पोलीस उपनिरीक्षक शहाजी गोसावी करत आहेत.