पिंपोडे बुद्रुक : ‘नुकतेच दहावी आणि बारावी परीक्षेचे निकाल लागले. या निकालात कोरेगाव तालुक्यातील प्राथमिक शिक्षकांचे पाल्यांनी घवघवीत यश संपादन केले. त्याबद्दल त्यांचा घरी जाऊन पेढे देऊन नुकताच कोरेगाव तालुका शिक्षक समितीच्यावतीने सत्कार करण्यात आला. हा नावीन्यपूर्ण उपक्रम विद्यार्थ्यांना प्रोत्साहन देणारा व संघटनेला नवी दिशा देणारा आहे,’ असे गौरवोद्गार शिक्षक बँकेचे संचालक किरण यादव यांनी व्यक्त केले.
यावेळी तालुक्यातील दहावी, बारावी, नवोदय, सैनिक स्कूल आदी स्पर्धा परीक्षांमध्ये चमकदार कामगिरी केलेल्या प्राथमिक शिक्षकांचा व त्यांच्या पाल्यांचा बुके देऊन सन्मान करण्यात आला. याप्रसंगी ते बोलत होते.
कोरेगाव तालुका हा दक्षिण-उत्तर असा सुमारे 65 किलोमीटर लांबीचा आहे. यामध्ये सोळशीपासून पवारवाडीपर्यंत अनेक प्राथमिक शिक्षक प्राथमिक शाळामध्ये ज्ञानदानाचे काम करीत आहेत. समाजातील मुलांना घडविताना आपल्याही मुलाला ते घडवीत असतात. वर्गातील मुलांच्या यशाबद्दल शिक्षकांना नेहमीच अभिमान वाटतो. आपल्या वर्गातील मुलांची प्रगती पाहून शिक्षकांचे ऊर भरून येते. याचप्रमाणे आपल्या स्वतःच्या पाल्याचे प्रगतीबाबत कोरेगाव तालुका शिक्षक समिती परिवाराने घरी जाऊन पाल्याचे व कुटुंबीयांचे अभिनंदन केले. ही गोष्ट आमच्यासाठी खूप प्रेरणादायी आहे, असे अनेकांनी यावेळी सांगितले. तसेच पालकांनी समाधान व्यक्त केले.
कोरेगाव तालुका शिक्षक समिती ही संघटनेच्या वेगवेगळ्या उपक्रमातून नेहमीच दिशादर्शक काम करत असते. वेगवेगळे समाजोपयोगी तसेच विद्यार्थ्यांसाठी प्रेरणा देणारे उपक्रम राबवित असते. यामध्ये प्राथमिक शिक्षक बँकेमार्फत देण्यात येणारी वैद्यकीय मदत सभासदाला घरी जाऊन देणे, कोरोनाच्या काळामध्ये उपेक्षित समाजातील कुटुंबांना अन्यधान्य वाटप करणे, बालसुधारगृहातील बालकांना व मतिमंद शाळेतील मुलांना फळे व शालोपयोगी साहित्य वाटप करणे आदी संघटनात्मक उपक्रम नेहमीच कोरेगाव तालुका शिक्षक समिती राबवीत असते.
यावेळी कोरेगाव तालुका शिक्षक समितीच्यावतीने अध्यक्ष नितीन शिर्के, सरचिटणीस नेताजी जगताप, उपाध्यक्ष उदय घोरपडे, कार्याध्यक्ष सुरेश पवार, कोषाध्यक्ष सतीश ढमाळ, सरचिटणीस प्रकाश पोळ, प्रसिद्धीप्रमुख अकबर मुलाणी, महिला आघाडीच्या अध्यक्षा मुस्कान आतार, सरचिटणीस विद्या खराडे, उर्मिला शिर्के, समितीचे क्रियाशील सदस्य संतोष मांढरे, जहांगीर हकीम, अविनाश खाडगे, प्रशांत निकम, रणजित निकम, बाबामिया आतार, देवेंद्र डांगोरे, संजय गंगावणे, विजय शिंदे, अमीर आतार, संतोष घाडगे, संतोष यादव असे अनेक शिक्षक समितीचे सभासद उपस्थित होते.