मुंबई : महाराष्ट्र शासनाच्या गृह विभागाने भा.पो.से. अधिकाऱ्यांच्या बदल्यांचे आदेश जाहीर करत राज्यातील पोलिस प्रशासनात महत्त्वाचे फेरबदल केले आहेत. या निर्णयामुळे अनेक जिल्ह्यांतील वरिष्ठ अधिकाऱ्यांच्या पदस्थापनांमध्ये बदल झाले आहेत.
या बदल्यांमध्ये सातारा जिल्ह्याचे पोलिस अधीक्षक तुषार दोशी यांची सांगली येथे बदली करण्यात आली आहे. त्यांच्या जागी पुणे येथील पोलिस उपआयुक्त निखिल पिंगळे यांची साताऱ्याच्या पोलिस अधीक्षकपदी नियुक्ती करण्यात आली आहे.
तसेच सांगलीचे पोलिस अधीक्षक संदीप घुगे यांची मुंबई येथील राज्य गुप्तवार्ता विभागात बदली झाली आहे. योगेश गुप्ता यांना कोल्हापूरहून गडचिरोली परिक्षेत्रात पोलिस उपमहानिरीक्षक (चार्ज) म्हणून जबाबदारी देण्यात आली आहे.
याशिवाय निलोत्पल, एम. रमेश, महेंद्र रेड्डी, श्रीकांत धिवरे आणि राजकुमार शिंदे यांच्या पदस्थापनांमध्येही बदल करण्यात आले आहेत. राज्यातील कायदा व सुव्यवस्था अधिक सक्षम ठेवण्याच्या उद्देशाने हे फेरबदल करण्यात आल्याचे शासनाने स्पष्ट केले आहे.
