वडूज : पुण्यात बेदरकारपणे बस चालवून नऊ जणांच्या मृत्यूस कारणीभूत ठरलेले संतोष माने प्रकरण अख्ख्या महाराष्ट्राला ज्ञात आहे.  असाच प्रकार आज वडूज येथे घडला. मात्र, सहायक पोलीस निरीक्षक मालोजीराव देशमुख तसेच शिवसेनेच्या पदाधिकार्‍यांनी वेळीच दाखवलेल्या प्रसंगावधानाने हा अनुसूचित प्रकार टळला आणि अनेकांचे जीव वाचले. 

याबाबत घटनास्थळावरून व पोलीस ठाण्यातून मिळालेली माहिती अशी की, आज सकाळी दहिवडीकडून वडूजच्या दिशेने एक भरधाव वेगाने एक कंटेनर (एमएच 12 पीक्यू 1451) येत होता. या कंटेनर चालकाने दहिवडी येथून येत असताना अनेक वाहनांना जोराचा कट मारून एका तलाठ्याच्या गाडीला ही जोराचा कट मारला.  
दरम्यान, वडूज शहरात हे वाहन येत असताना या वाहनाचा वेग 80 ते 90च्या आसपास होता. शहरात आल्यानंतर सुद्धा त्या वाहनचालकाने आपल्या गाडीचा वेग हा तसाच ठेवत शहरातून प्रत्येक गाडीला ओव्हरटेक करण्याचा पर्यत केला. हा प्रकार पाहून  शहरातील काही लोकांनी याबाबत वडूजचे सहायक पोलीस निरीक्षक मालोजीराव देशमुख यांना माहिती दिली. 

यावेळी संतोष काळे हे वडूज येथील कराडच्या मुख्य रस्त्यावर ड्युटीला होते. त्यांना तो ट्रक वेगाने येताना दिसला. त्यांनी त्या ट्रकचालकास वाहन थांबवण्याचा इशारा केला. मात्र, त्या ट्रक चालकाने ते वाहन तसेच पुढे नेण्याचा प्रयत्न केला. याच वेळी संबंधित कंटेनरचा पाठलाग करणारे शिवसेना विभागप्रमुख आबासाहेब भोसले यांनी चालत्या कंटेनरच्या केबिनमध्ये जाऊन वाहनाचा ताबा घेऊन प्रयत्न केला. त्याच वेळी प्रसंगाधान दाखवून वाहतूक कर्मचारी संतोष काळे यांनी त्या वाहनाला रस्त्यावर आडवे जाऊन थांबवण्याचा ही प्रयत्न केला.

अखेर पोलीस काही नागरिकांनी त्या वाहनाचा पाठलाग करत त्या वाहनाला थांबवले. आणि पोलीस ठाण्यात आणले. पोलीस ठाण्यात आणल्यानंतर त्या वाहनचालकने मद्यपान केले असल्याचे दिसून आले. याबाबत पोलिसांनी त्या चालकास ताब्यात घेतले असून, गुन्हा दाखल करण्याचे काम सुरू आहे. 

सदर घटनेबाबत कार्यतत्परता दाखवत नागरिकांचे प्राण वाचवणार्‍या पोलीस वाहतूक कर्मचारी संतोष काळे तसेच आबासाहेब भोसले यांचे नागरिकांनी अभिनंदन केले.